Mai prus!
Firmaus su bocidòrgiu de su pòpulu palestinesu.
Seus totus possìbilis miras.
Unu monumentu in Roma dedicau a is vìtimas de su bocidòrgiu de su pòpulu palestinesu.
Boleus pesai de bàsciu in Piazza delle Camelie, in su bixanu romanu de Centocelle, una stàtua de ferru, atzarxu e brunzu dedicada a is vìtimas de su bocidòrgiu palestinesu su 25 de abrili 2026.
Dd’eus a ponni in Piazza delle Camelie, logu sìmbulu de sa Resistèntzia de Centocelle, a pagus metrus de sa losa chi arregordat sa genti morta in sa gherra de liberatzioni de su nazifascismu.
S’òpera at a essi unu brocu scurtòreu fatu de duas pubas de ferru cun partis de corpu de brunzu:
una figura de persona manna e una figura de pipiəs, ambaduas cun su sìmbulu de mapa de sa Palestina.
Sa figura de persona manna, una fèmina, at a assimbillai fintzas in sa mannesa a una de is cìncui pubas postas in Porta San Paolo ananti a sa Piramide su 25 abrili 1995; sa figura de pipiə at a tenni sa matessi forma ma a mesura de pipiu.
Ambaduas ant a tenni unu fundu de ferru cun puba de atzarxu anca si nci pòdiri sprigai, comenti in s’òpera de Porta San Paolo.
Comenti àtera genti meda in Itàlia, si parrit de cumpartziri is responsabilidadis de su bocidòrgiu in Palestina, fintzas cun is armas fabbricadas innoi.
Comenti truma de artistas, imperaus linguàgius e còdixis po trasmiti messàgius po fai pentzai e po fai movi su sentidu. Intendeus s’abbisòngiu de fai su chi scieus fai: imperai s’arti comenti aina de sentidu e denùntzia colletiva.
Po custu eus detzìdiu de fai e arregalai a sa tzitadi un’opera dedicada a su pòpulu palestinesu.
Su trabballu nostu at a essi volontàriu e a indonu: no eus a arriciri dinai: est ativismu, est su contributu nostu.
Invècias, ferru, atzarxu, brunzu e sa trabballadura in funderia costànt, dd’eus a bòlliri pagai cun una arregorta de dinai popolari, comenti iaus fatu trint’annus a oi po “Tutti potenziali bersagli”.
S’iat a pràxiri incingiai s’òpera su 25 de abrili, arregordendi su prexu de is ajajas e is ajajus nostus a s’acabbu de s’ocupatzioni nazista e de su regimi fascista.
Disigiaus chi puru su pòpulu palestinesu potzat bivi luegus sa matessi liberatzioni e prexu.
Fadeus duncas unu apellu a totu sa genti arrennegada, a chini fait arti e comunicatzioni in calisisiat forma, a is produsiduras de tzìnema, a is domus de imprenta e de mùsica, a is grupus, a is bandas e a is festival musicalis de calisisiat genia artìstica, a is crews e a is tribes, a is colletivus e comitaus de basi – de scientis, de fàbbrica e de bixinau –, a is realidadis chi si manigiant a solas, a su mundu de is assòtzius, a is organizatzionis palestinesas, a cudda parti de is comunidadis ebraicas chi in totu su mundu funt contras a s’ocupatzioni e a su bocidòrgiu in Palestina, a is movimentus antifascistas, antiratzistas, ambientalistas, antiproibitzionistas e solidalis; a is comunidadis de migrantis; a is organizatzionis po is deretus de sa genti LGBTQIA+; a is sindacaus; a is arretzas natzionalis e internatzionalis; a is ONG chi sarvant sa genti in mari; fintzas a is organizatzionis non profit po is deretus de s’umanidadi, a chinisisiat, in ònnia logu, trabballat po unu mundu diferenti, necessàriu e possìbili.
Pedeus de:
adotai, fai impari, agiudai e donai dinai po un’òpera chi denuncit oi, e arregordit cras, su bocidòrgiu de su pòpulu palestinesu. Imoi, luegus, in su mentris chi sa stòria passat.
FIRMAUS SU BOCIDÒRGIU DE SU PÒPULU PALESTINESU